高原惡霸基多斬「瓜」切菜

猪拉多纳

17/04/2012
文： 朱楓

墨西哥球隊瓜達拉哈拉早前請得告魯夫擔任會長，諗住可以發圍，點知戰績反而被拖累，聽朝喺南美自由盃G組「出線大戰」，出戰有強勁高原威力嘅厄瓜多爾地頭龍基多，睇怕九死一生，「讓球主勝」有2.27倍值得支持！（開賽時間：周三早上7：15）


先講G組形勢，基多暫列第2，今仗只要贏波就肯定以次名出線，相反瓜達拉哈拉至少要贏基多4粒，仲要望另邊廂迪芬沙士砵亭贏唔到，先可以晉級16強，出線形勢被動。由於基多主場位處海拔2,800米高原，訪客去到真係索晒氣。唔怪得翻查數據，原來基多近4屆自由盃，主場出擊都未輸過波，今屆更先後以2：0同3：0擊敗迪芬沙士砵亭同沙士菲，絕對唔講得笑。

瓜達拉哈拉5連敗

瓜達拉哈拉早前請得荷蘭球王告魯夫擔任會長，初頭效果唔錯，點知近期卻錄得5連敗，日前主場不敵堤格雷斯後，更宣布緣盡墨超季後賽，好衰唔衰英國傳媒喺呢個時候，竟爆出利物浦都想搵告魯夫擔任新總監，牆腳都畀人撬埋，睇怕瓜達拉哈拉今場就算有中場祖利奧拿華刑滿復出，亦好難創造出線奇迹。


賽制：32支球隊分8組進行雙循環分組賽，每組首、次名躋身16強淘汰賽。