緬恩斯狼堡演入球騷

猪拉多纳

20/04/2012
文： 朱楓

今晚德甲上演獨腳戲，由緬恩斯主場對禾夫斯堡。講近況緬恩斯的確好啲，不過「狼堡」教頭馬加夫近日開到聲話想留隊作長遠發展，仲話希望攞下屆歐洲賽入場券，預期今晚將出齊架生強攻對手，有權合演一場大騷！（有線64及204周六凌晨2：30直播）


上半季曾經跌落尾四嘅緬恩斯，自從今年1月簽番舊將穆罕默德施丹後，火力大有好轉，場場都有波入，直至上場對拜仁先斷纜。今晚主場對禾夫斯堡，基本上只要保持不敗，就肯定可以成功留級。為應付呢場關鍵大戰，據講教練杜曹近日喺練波時，要求球員盡量保持控波在腳，好多球員練完後都大讚有用。


由於護級在望，有指緬恩斯已開始為下季做準備，希望同前鋒施沙拉爾同後衞卻治賀夫續約，但據報兩人近日都獲好多球會垂青，有指「狼堡」早喺今年1月更已想買施沙拉爾，為前途，朱楓相信施沙拉爾今晚必定分外落力。

馬加夫誓爭歐洲賽資格

對家禾夫斯堡近排表現大跌錄得3連敗，不過將喺下季尾同球會滿約嘅教練馬加夫，近日接受訪問時就話好希望留隊多一段日子，幫「狼隊」重現盛世，仲話明今季餘下賽事會力爭分數博踢下屆歐洲賽，預計今晚會派晒希美斯同文迪蘇傑呢對喺下半季大勇嘅箭頭一齊落場，實行同緬恩斯駁火，畢竟兩隊近年交手亦慣開鬥攻，對上6次交手就有4次開大，而且不乏3：4同3：3等大波膽，今場真係值得再追o架！

橫數千軍

緬恩斯旺開入球大


‧近8場3勝1和4負，有7場開大。

‧近6次交手2勝2和2負，4場開大。

禾夫斯堡作客腳軟

‧近10場作客得2勝1和7負。

‧31場聯賽21度開大，排德甲第3。