多驹列阵 声势浩大 告东尼力撑蔡明绍

猪拉多纳

　　蔡明绍之前停赛3日，有冇影响告东尼马房出击大计？如果话冇就呃细路！该3期之内係赢过一件「美的人生」，亦有「无敌骏驹」、「帝豪骏驹」和「牛精巨星」上到名，不过，跑输那批为数众多，唔少仲係有晒飞数，可惜跑完用放大镜搵唔到！

　　呢期就唔同嘞！蔡明绍复出，东廐9驹裏只得两匹由其他骑师帮手，摆出咁嘅阵容，唔係为搏命，唔通为凑热闹？！所以，今期东廐呢股势力真係要高度重视。

　　东廐摆出一个咁强阵式，计有新胜「美的人生」、泥地未输过「开心指数」、第七场出足三件，而尾场再整多匹转仓好马「天外之天」，如果攞住呢批马赢唔到两W，真係要打「箩柚」。

　　依个人看法，「开心指数」及「天外之天」逃避唔到热门身份，焗住热食，赛绩好、实力强，呢类马唔会三心两意。

　　至於第七场出够3驹，究竟够唔够实力「围」隻大热门「跑宝贝跑」，未鍊过好难讲，而当中应以「风火神驹」最有可能係主力，始终曾力撼「鹰之团」，如今日场地正常，放出嚟，或可捱到。Jack