車仔晉級諗吓好喇

猪拉多纳

24/04/2012
文： Wendy

若純粹講自己主觀願望，我希望車路士可以進身歐聯決賽，不過現實歸現實，今晚車仔去到魯營想贏，真係難過中八串一！雖然巴塞啱啱喺西甲國家打吡主場輸畀皇馬，但車仔班老人兵又點同皇馬比？我認為巴塞今場起碼可以淨勝兩球，捧巴塞「讓球主勝」。

首回合贏波靠運

首回合我有份做直播，車仔贏波除防守做得好，仲有啲運仔，靠楣柱幫手頂住巴塞，冇乜攻勢之餘，中場又完全受壓，唯一入球係靠林柏特發動反擊，但其實除咗呢球，「林伯」做唔到太多嘢。


今晚真係唔知車路士老將體力夠唔夠應付，仲要杜奧巴有機會因傷缺陣，若果用「王子」費蘭度托利斯做正選，恐怕連僅有嘅突擊機會都畀佢浪費埋！


巴塞今晚一定一開波就狂攻，中堅碧基終於可以復出，令後防不至太鬆散。全世界開出巴塞讓球半、兩球嘅亞洲盤，雖然係好過分，但就可想而知車仔去到魯營要力保不敗係幾難，捧巴塞「讓球主勝」啦！