王位爭奪戰

猪拉多纳

25/04/2012
文： 巨高

周中意甲開快車，首、次席球隊祖雲達斯及AC米蘭分途出擊均遇上弱旅，目前祖記僅比AC多三分，餘下五輪賽事兩隊都要繼續搏命，務求比對手率先到達王座。AC迎戰熱拿亞（now 633及660周四凌晨零時直播），及祖記作客切塞納（now 632周四凌晨零時直播），兩軍贏面高唱！

AC冧粉絲數爆熱拿亞

月初巨高勁中國際米蘭主其他波膽，至今仍然津津樂道。正所謂食髓知味，今輪又有好料，主角就係AC米蘭。「紅黑兵團」主場對熱拿亞，相信呢支上季冠軍好有機會以瘋狂比數大炒對手，「主其他」少少哋12倍不妨一試。

熱拿亞哀兵魂魄唔齊

熱拿亞屬現時廿支意甲球隊中，士氣及表現最差一隊，上輪聯賽對住錫耶納衰到喺主場輸一比四，搞到球迷掟煙火入場洩憤，仲怒罵球員毫無榮辱感，命令所有球員即刻除低件波衫。面對球迷辱罵，熱拿亞球員都忍唔住當場落淚，可以講熱拿亞已經失去靈魂，成隊波只帶住軀殼進入聖西路。


AC已連續兩次喺主場失分，再於爭標關鍵時刻失分的話，班粉絲隨時會學熱拿亞球迷咁叫球員剝衫，唔想「瘀爆」，今場就非勝不可。最近有傳AC教練阿里基同貝老闆鬧不和，咁啱上輪對博洛尼亞時，貴賓席就見到名牌主帥卡比路同高層加利安尼一齊睇波，呢類鏡頭難免令人聯想到阿里基去留問題。後者想繼續執教的話，今場比賽對熱拿亞唔單止要贏，仲要贏得燦爛，「主其他」捧得過。