畢爾包炸士砵亭博翻身

猪拉多纳

26/04/2012
文： 笛子波童

另一場歐霸盃四強次回合，畢爾包主場鬥士砵亭，畢爾包首回合落後一比二，想打入決賽今仗許勝不許和，教練狂人比爾沙一向主張進攻，面對作客失波偏多嘅士砵亭預料有唔少入球，波童捧1.6倍入球大。


（有線62及202台周五凌晨３時05分直播）


畢爾包首回合作客輸一比二，能夠搶到一個作客入球算係有交代，理論上佢哋今場只要小勝一比○便可憑作客入球優惠晉級，不過斷估一向主攻嘅比爾沙唔會冒險去刻意求變。睇番畢爾包對上兩圈淘汰曼聯、史浩克04，球隊同在首回合作客領先情況下、次回合返到主場一樣照攻，既然今次和波都唔掂，相信就算取得領先亦唔會縮得太後。

士砵亭入得又失得

士砵亭今屆歐霸盃主場八戰全勝，但作客成績明顯差好遠，單計對上五場歐霸作客賽事只得兩和三負，而且場場有失波，防線難予人信心。好彩佢哋前線有雲禾夫斯雲高、迪亞高卡普、馬迪亞斯費南迪斯等掛帥，十六強淘汰曼城、八強踢走米達列斯嘅次回合都在作客環境之下先開紀錄，如果今場又畀士砵亭搶到第一個入球，主隊便起碼要入三球才可反敗為勝，相信到時雙方踢法會更加Open，有利開大。