畢爾包將士用命捧「W」

猪拉多纳

26/04/2012
文： 力奇

力爭35年來再次殺入歐戰決賽嘅西甲勁旅畢爾包，今晚喺歐霸盃4強次回合主場迎擊葡超士砵亭，恃住聖馬美斯球場嘅強勁氣勢，加上媲美巴塞嘅流暢組織，要收復首回合輸1：2嘅失地絕對唔難。主隊今仗仲要有兩大重臣查維馬天尼斯同蒙尼恩復出，有力大勝一場，2.25倍「讓球主勝」要捧！（有線62及202周五凌晨3：05直播）


喺1977年曾經殺入當時歐協盃決賽不敵祖雲達斯嘅畢爾包，今屆挑戰歐霸盃，晉級過程先後淘汰曼聯同史浩克04等勁旅，大有遇神殺神、遇佛殺佛嘅氣勢。呢隊「A貨巴塞」今屆無論踢法同機動性都媲美正牌地上最強，喺西班牙盃已經成功殺入決賽，西甲亦取得第6位，證明成績絕非「符碌」，實力絕對唔講得笑。

歐戰主場8仗不敗

陣中球星唔少，首席射手「長人」洛蘭迪頭頂腳踢樣樣皆能，喺今屆歐霸盃已入6球，前線有佢係入球保證。最重要係首回合坐波監嘅中場發電機查維馬天尼斯，以及上輪聯賽因眼疾休戰嘅新星前鋒蒙尼恩，今仗都可同時復出，強陣出擊，加上佢哋個已經跨季歐戰8場主場不敗嘅聖馬美斯球場優勢，今仗博佢哋贏2球或以上，點算貪心？

士砵亭征西唔老利

士砵亭呢邊，首回合戲劇性反勝2：1，問心講力奇覺得佢哋有多少幸運，只係今次輪到作客出擊，仲要考慮埋佢哋歷來9次出訪西班牙都未嘗獲勝，今仗捧佢哋真係有多少牙煙。人腳方面，智利國腳中場馬迪亞斯費南迪斯復出，但同時法比安連拿奧度同守將阿拔圖洛迪古斯齊齊缺陣，計落實力再削弱多少，一旦早段被打開缺口，大敗都唔出奇。

橫數千軍

畢爾包鬥葡兵醒神


‧主場3鬥葡萄牙球隊全勝。

‧近8場歐戰主場得4勝4和不敗，上次落敗已是09/10球季。

士砵亭中段入波多

‧9次作客西班牙得3和6負。

‧自分組賽起13戰入19球，當中9球來自31至60分鐘。