港甲玩足協盃 得個噏字

猪拉多纳

27/04/2012
文： 波男

大約個幾月前，波總話事人拜仁喺董事會後宣布，今屆中國足協盃預埋港甲玩，波總可以派隊北上參賽，點知後來CEO發新聞稿話有人洩密，跟住大家就冇再討論落去，呢件事亦冇晒下文。


拖得幾拖，五月底開鑼嘅中國足協盃，四月廿四日星期二已經喺北京召開發布會，搞埋抽籤儀式同公布賽程。今屆總共有四十八隊參賽，係歷來規模最盛大一次，首輪賽事由「草根」球隊對壘，包括四支業餘隊、兩支大學生聯賽隊及兩支亞洲展望城市聯賽隊。第二輪賽事輪到十六支中甲球隊登場，十二支中超隊則於第三輪亮相，四支參加亞冠球隊恒大、國安、宏遠及泰達直入十六強，決賽採用主客制形式，定於十一月十日及十七日。

抽晒籤冇港甲份

波總將「參加足協盃」列為「機密」，究竟波總討論結果如何，點樣回覆人哋，亦變成波總嘅內部事宜，如果拜仁當日冇同傳媒「爆料」，大家根本唔知道有呢件事添！


依家結果就係，人哋連籤都抽埋，今屆足協盃冇港甲份，各隊收咧後可以安心放暑假，一切如常，唔使諗咁多無謂嘢嘞！