熱刺布力般大駁火

猪拉多纳

29/04/2012
文： 蘇豪

熱刺季尾有如洩氣皮球，但係仍然有機會爭奪歐聯席位，大拿拿幾千萬鎊收入，唔想見財化水，今次主場對布力般流浪不容再失。布力般貴為英超客場失球王，作客失波能力絕非浪得虛名，搶分護級顧得攻嚟守唔到，預期又會上演另一場入球騷，捧大！（有線300及200台周日晚11時直播）


熱刺戰至英超最後直路自毀長城，近九場聯賽只贏一場，已被阿仙奴同紐卡素趕過，爭取歐聯席位形勢告急！自從傳出熱刺領隊夏利列納會教英格蘭國家隊後，球隊戰績直線插水，夏利叔話主要因為傷兵問題，但其實多多少少同佢離隊傳言有關，無論點都好，依家去到關鍵時刻，今場比賽有番王牌前鋒艾迪巴約，仲有飛翼加里夫巴利同指揮官莫迪歷在陣，中前場齊腳，唔贏真係冇藉口。

布力般作客失波王

布力般流浪位列尾二，若想留喺英超急需搶分，佢哋兩大攻擊主力耶高保同凱列特同樣當弗，並非全無突擊之力，特別係熱刺左閘伊高圖受傷提早收咧，凱列特有機會喺進攻右路發難。


不過，布力般防線不穩，喺作客環境下特別曳，大軍客場失球數字冠絕英超，聯賽作客前列球隊紐卡素、阿仙奴同曼城都大敗，淨係試過失驚無神爆冷作客三比二贏曼聯，今次捧入球大最穩！