巴塞攻「細」難求

猪拉多纳

29/04/2012
文： 安高

巴塞隆拿喺上周國家打吡輸波之後，西甲爭標機會基本上係名存實亡，考慮到主帥哥迪奧拿日前宣布季後離職，球隊內部仲要時間撫平傷痛，鬥志肯定有限，今晚出訪打緊風流波嘅華歷簡奴，部分主力又未必落場，入波相信唔慌多，今戰全場入球大細中位數係3.5球，安高撐1.68倍入球細。（now632台周一凌晨3：30直播）


上星期國家打吡主場不敵皇馬，周中歐聯次回合又畀車仔擯出局，巴塞今季餘下目標就只係下月底嘅西班牙盃決賽。「地上最強」過去兩周連打3場硬仗，球員真係身心俱疲，主帥哥迪奧拿又宣布唔續約，球員同時要接受埋呢個壞消息，心情點都會受到影響，相信哥帥今仗都好大機會收起部分主力回氣，單靠小將艾錫古恩卡同基斯甸泰路擔大旗，又點會多波入。

華歷簡奴打風流波

對手華歷簡奴暫列15位，高過護級安全線9分，護級壓力唔大，可以盡情踢風流波，所以近7戰僅得1勝6負，佢哋今仗仲有守將卡沙度同拉巴卡停賽，戰鬥力受損，睇怕都唔會點搏命，惟望佢哋話晒主場出戰，唔會想被大炒失禮，肯死守輸1、2球，個入球細唔難開得出。