愛華頓變大娛樂家

猪拉多纳

01/05/2012
文： Mic少

英超季尾最具娛樂性球隊並非傳統Big4勁旅，而係「拖肥糖」愛華頓，佢哋勝在冇包袱，可以豁出去大踢進攻足球，已連續三場聯賽都入四球，真係誇張，今晚作客鬥同樣踢緊風流波嘅史篤城，預料會大手交收，2.05倍入球大抵玩。（有線301及201台周三凌晨2時45分直播）

3場狂省12粒

愛華頓近年畀人攻力不足嘅印象，但依家搖身一變成「進攻王」，好大程度上因為簽啱人，喺冬季轉會市場羅致克羅地亞前鋒謝拉域，佢喺鋒線頭頂腳踢樣樣掂，令球隊進攻有重心。而且謝拉域除自己入波之外，亦可牽制對手守衞，令隊友有更多空間後上攻門，難怪中場費蘭尼都連續兩場有波入。


由於「拖肥糖」已冇嘢好爭，心態上開放好多，最佳例子當然係前排作客曼聯，同對手鬥攻，打和四比四夠晒經典，總計近三場入十二粒，今仗到訪史篤城冇理由會縮。


史篤城入波唔多，但勝在夠頑強，尤其係主場，落後時往往可以追和甚至反勝，強如車路士、利物浦、曼聯、熱刺、曼城及阿仙奴，今季都未能喺佢哋地頭全取三分。故史篤城成績雖然唔及愛華頓，但未必會輸，特別係兩位高大球員賀夫及高治頻頻入波，可望利用高空轟炸打破對手大門，一於捧大盤。