同利記爭排名拖肥唔怕史篤城

猪拉多纳

01/05/2012
文： 力奇

今晚英超史篤城主場對愛華頓，咪以為睇住佢哋排名，就一定係例行公事，查實今場係「默西賽德郡打吡暗戰」，事關愛華頓家陣以2分之微壓住同市宿敵利物浦排第7，如果可以就此過終點，對拖肥糖嚟講已經係個偉大成就。好彩佢哋今晚遇着嘅史篤城無論狀態同鬥心都差一截，平手盤捧愛華頓有着數！（有線201及301周三凌晨2：45直播）

近況弗6戰不敗

拖肥糖同紅軍雖然話係宿敵，但講球隊成就自然差一大截，難得今季可以一吐烏氣，你話佢哋點會唔搏命先？最緊要係拖肥糖近況的確出色，喺英超已經連續6場不敗，季中加盟嘅克羅地亞射手謝拉域認真堅料，近8場入咗9球之多，有佢孭飛，就算話中場魯迪維爾同守將巴尼斯養傷，一樣夠殺啦！


論實力史篤城其實唔曳，只係今季要分心歐霸盃，聯賽戰績差少少在所難免。事實上，佢哋今季喺主場面對Big6竟然能夠6戰不敗，絕對唔簡單，只係佢哋遇強愈強、遇弱愈弱嘅習性，對住愛華頓隨時出事。再者，佢哋近8戰只得1勝，狀態麻麻哋，前鋒薛迪比、中場戴奧同守將韋堅遜又唔出得，打緊風流波唔愁降班嘅佢哋，今場仲憑乜贏波？