鯨魚訪城南捱「細」界

猪拉多纳

01/05/2012
文： 走肖

「得點王」缺陣，入波唔慌多。城南一和今晚喺亞冠盃G組主場對名古屋鯨魚，最近鯨魚有日職「2年連續得點王」約舒亞堅尼地避戰，前線火力大減，呢場吼實1.72倍入球細好過。（now671台周二晚6：30直播）


約舒亞堅尼地因為腰傷關係，近日返咗老家澳洲接受治療，佢缺陣期間，鯨魚5戰得2勝2和1負，當中得主場贏魚腩札幌岡薩多，其餘4場未曾入多過1球，假如話約舒亞堅尼地缺陣冇影響就呃你。事實上，現時鯨魚要用日本奧運隊前鋒永井謙佑擔大旗，唔係話佢冇料，但相比之下威力差得遠囉。


由於前線唔夠人使，最近鯨魚教練史杜高域要安排中場金崎夢生客串打前鋒，滿足佢排出4-3-3陣式嘅要求，難免拖低前線火力。更何況鯨魚近排惡戰連場，早排先後硬撼FC天津、廣島三箭同浦和紅鑽，跟手又要同川崎前鋒鍊過，球員難免出現疲態，唔容易開入球騷。

城南金牌中堅復出

另方面，韓職代表城南一和係前屆亞冠盃冠軍，由於現時兩隊各得6分，領先同組嘅FC天津同中岸水手3分，形勢上呢場打和都無壞，咪忘記城南有2010年亞洲足球先生、後防大杉奧尼洛夫斯基傷愈，最近佢已經好番可以落場，今場好大機會復任正選，相信會帶挈城南防守力加強，順利開出入球細。

橫數千軍

城南亞冠勁開首球


‧亞冠盃4戰有3次先開紀錄。

‧分組賽4戰攻入9球。

鯨魚換邊前旺和波

‧今季半場5次領先、7次打和。

‧亞冠盃4戰有3次開「和和」。