羅馬鬥士保帥圍剿基爾禾

猪拉多纳

01/05/2012
文： 亨格比利

意甲殺入大直路，首都球隊羅馬仲要為來屆歐聯入場券努力，教練安歷基亦都前途未卜，造訪無欲無求嘅基爾禾，論戰意肯定勝一籌，就算有兩大攻擊好手停賽，照計要攞晒3分應該冇難度，一於捧2.1倍客勝。（now633及660台周三凌晨0：00直播）

總監球員齊撐安歷基

盛傳羅馬主帥安歷基會喺今夏被炒，不過球會總監巴甸尼同埋以泰迪為首嘅一班球員，日前就齊齊開腔力撐安歷基，陣營士氣不知幾好。雖然首席射手奧斯華度同攻擊中場拉美拿齊齊停賽，但咪忘記波連尼踏入2012年之後腳風勁順，配合托迪同保贊攻堅，火力依然信得過。


賽前安歷基仲收到好消息，就係養傷多時嘅貝迪素完成咗整課操練，今晚有呢位阿根廷中堅撐住條防線，基爾禾想搵食冇咁易！畢竟主隊已經連續4場聯賽冇波入，35輪聯賽過後只係入咗30球咁大把，何況佢哋排名高不成低不就，無論鬥心同戰鬥力都輸羅馬一大截，今仗唔似會偷到雞囉！