巴塞 馬拉加做「大」龍鳳

猪拉多纳

02/05/2012
文： 查理阿蛋

巴塞近個幾星期內先後失去兩項錦標，致命打擊係教頭哥迪奧拿又話季後離隊，不過班球員似乎想踢番幾場好波幫哥帥餞行，加埋美斯都希望打低C朗做金靴射手，今晚喺魯營迎戰馬拉加實行做「大」騷，大細中位數去到3.5球都照捧1.78倍「入球大」啦！（now632台周四凌晨2：00直播）

馬拉加近7次對賽輸晒

哥帥喺巴塞嘅日子已經進入最後倒數階段，由上場復勇大炒華歷簡奴嚟睇，似乎班球員係想將呢幾場「哥帥最終戰」踢得好好睇睇，而且一班新仔難得有機會上陣，當然會全力以赴博未來教頭維蘭路華賞識，可以預期上場有進帳嘅堤亞高艾簡達拿、基斯甸泰路會有出眾表現。


老實講，美斯喺巴塞歐聯出局責任頗大，先係首回合畀人偷波導致失球，仲有射唔入12碼累巴塞出局，相信呢位今季為巴塞喺各項賽事攻入67球嘅「球王」，會以打低C朗攞西甲同歐洲金靴獎為目標補償畀班擁躉，況且馬拉加一直畀「地上最強」剋住，近7次對賽全部輸波收場，今晚想輸少粒都真係幾難咯！