紅鑽「連勝」成教頭止痛藥

猪拉多纳

03/05/2012
文： 走肖

日職天與地今晚直播上演，浦和紅鑽喺主場對橫濱水手，1.84倍主勝要吼實。兩隊今季分別由新教練領軍，紅鑽由護級球隊重返爭標行列，水手由前列球隊淪落到要護級，最近紅鑽教練柏杜域腰痛坐櫈仔都堅持要親自領軍，「連戰連勝」肯定係佢最佳止痛藥，士氣回升值得再追。（now633及660台周四晚6：00直播）


柏杜域曾經帶領廣島三箭出戰亞冠盃，熟悉日本足球、執教功力深厚，但所謂年紀大、機器壞，日前紅鑽作客以2：1打沉名古屋鯨魚，柏杜域要忍住腰痛，坐住櫈仔喺場邊親自督師，據講紅鑽球員勁感動士氣大振，連新加盟嘅槙野智章都話，依家對柏杜域嚟講，球隊連勝就係最佳止痛藥。


至於水手新教頭樋口靖洋見到大阪飛腳、川崎前鋒同神戶勝利船連環炒教練，應知自己做唔得耐。上季水手排第5位，樋口靖洋上任後開季連盃賽連續10場不勝，直至日前主場以3：0贏勝利船至開齋，睇落完全唔似有前途，被炒只係時間問題，加上後衞富澤清太郎停賽，今場想有運行都難。