色當爭升班強攻克萊蒙特

猪拉多纳

04/05/2012
文： 亨格比利

法乙殺到入大直路，巴斯蒂亞已提早封王，不過剩番兩張升班門票依然爭崩頭。其中克萊蒙特同色當兩支爭升班分子，今晚就會正面交鋒，色當作客成績好過主場多多聲，教練古約特最近變陣出擊亦明顯使得，造訪近況回落嘅克萊蒙特可秤先，直取3.1倍客勝。（開賽時間：周六凌晨2：00）

發表「未來3戰全勝」宣言

先講吓形勢，法乙第2嘅蘭斯同第5嘅色當只係相差6分，聯賽剩番3輪真係咩都有可能發生。色當上月底輸畀甘岡之後，唔少球迷即場向色當球員柴台，教練古約特都知餘下賽事唔衰得，上仗變陣出擊搵馬馬度迪亞路同艾度拿爾戴亞比擔正即刻奏效，主場大炒杜亞斯3：0，賽後仲發表「未來3戰全勝」宣言，信心爆晒棚！


雖然話色當作客，但佢哋嘅客場戰績屬聯賽第1，今季造訪巴斯蒂亞、蘭斯同特魯瓦等實力分子都搶到分，表現仲醒過主場。反觀排第4嘅克萊蒙特呢排就跌晒Watt，對上5場聯賽足足有4場失分，一對守將佩連尼爾同艾雲尼亦分別因為膝部同腿筋傷缺陣，今戰輸埋絕對唔奇。