紅軍怒爆車仔

猪拉多纳

05/05/2012
文： 麥馬拿仁

專注、鬥心同飢渴感，屬贏波三大要素；利物浦三瓣都贏車路士，今晚捧盃在望！英格蘭足總盃決賽紅軍、車仔會師中立場溫布萊，論牌面質素，車路士或稍稍秤先，但之後仲有歐聯決賽難免分心，加上近五年三捧足總盃冇咁飢渴。利物浦本季成敗全繫於足總盃身上，聯賽留力養精蓄銳，加上誓要緝拿叛將費蘭度托利斯及魯爾梅利斯，「紅軍」冠軍賠率有2.02倍值博！（now 671及672周日凌晨零時15分直播）

利物浦全力晒冷

呢對老對手，近年屢於盃賽碰頭，對彼此踢法、優劣、排陣熟到爛，大家整體實力又非常接近，邊隊奪標要睇臨場發揮。利物浦本季於聯賽徹底失敗，早早就將全部注意力集中於盃賽身上，隊長謝拉特明言，只有捧走足總盃先能挽救今個賽季，領隊杜格利殊亦將自身前途完全押注於足總盃身上，上輪聯賽竟然畀九個主力球員休息。主力蘇亞雷斯、丹尼爾艾格、連拿、格連莊臣等於百分百狀態下，根本唔赦車仔。


一向強調，利物浦最大敵人就係自己，只要「紅軍」全心全意比賽，力足同任何勁敵周旋，踢出遇強愈強特性。事實上，杜格利殊係車仔剋星，去年初正式回歸後，三次鬥車路士贏晒，仲要三場都係作客。「紅軍」一向擅踢下風波，打穩守突擊合晒何尺，今場決賽預計都係由車仔主導，更合利物浦發揮。

車路士硬仗頻頻

早前歐聯準決賽，皇馬、巴塞意外雙雙出局，同於兩回合間須彼此硬撼極有關係。須知道高手過招，只要體能狀態稍有不及就成勝負分野，車仔喺呢方面，實在不及紅軍。車路士季尾三線作戰，於足總盃四強擊敗熱刺後，要兩次硬撼巴塞隆拿，又要對阿仙奴同紐卡素，一共惡戰咗五場；反觀「紅軍」反勝愛華頓晉級後，只於聯賽hea踢三場，邊隊着數唔使再講。今仗正宗係五五波，和味極濃；如果要踢加時利物浦必定佔優，撐「紅軍」捧盃啱數。