紅軍拿手劏車 心理有優勢

猪拉多纳

05/05/2012
文： 江忠德

公平競技精神喺唔同領域有唔一樣嘅演繹，騎師喺賽馬當中留力，就會被研訊甚至罰停賽，足球圈車路士同利物浦喺英超大輪換而輸波，就被視為理所當然。講到踢足總盃決賽最緊要就係心理，紅軍喺呢瓣強過藍戰士。

藍戰士連場硬仗輸蝕

正所謂一物治一物，利物浦呢兩季食住車仔，無論係作客定殘陣出擊，對住藍戰士就變成鐵血將軍咁勁。紅軍一早就喺英超冇料到，亦畀球迷鬧到麻木，所以領隊杜格利殊（圖）先至夠膽對富咸揸流攤，置之死地而後生，期待呢場決賽表現脫胎換骨。


車仔由2月中旬開始三線作戰，一周雙賽兼場場硬仗，迪馬堤奧迫於無奈收起主力，其實嚟嚟去去都係呢15、6個球員苦戰，幾個主將多抖兩三日，體能上都唔會着數幾多，況且藍戰士近4次交手輸晒畀紅軍，同樣喺硬撼中佔唔到優勢，反而畀對手搶截反擊得米，利物浦呢場繼續踢擦鞋仔波實打亂車仔節奏。