美斯謙創富坊

猪拉多纳

06/05/2012


項目︰第一隊入球

推介︰巴黎聖日耳門


乘住上周中榜首蒙彼利埃失分，富豪球會巴黎聖日耳門（上圖）已追近至彼此相差三分，今晚作客華倫西恩斯，定必一開波就搶攻。事實上，華倫西恩斯係一支慢熱球隊，近八場有五仗被對方入波先，相反聖日耳門係急先鋒，近八場有六次先開紀錄，不妨要首都球隊「第一隊入球」。（周一凌晨3時15分開賽）

項目︰讓球

推介︰大宮松鼠下盤


日職大阪飛腳作客大宮松鼠要讓波，好大程度上係因為往績食住松鼠，過去兩季四次對碰贏晒，但問題係飛腳今非昔比，人腳完全唔同晒，唔可以揸住死賽績買波，而且佢哋今季作客四場都未贏過，邊有資格讓波，強捧松鼠下盤。（周日下午3時開賽）

項目︰半場大細

推介︰芬洛大

足智彩「半場大細」今日70場開盤賽事，只有四場「半場大」低於2倍，分別係三場荷甲阿爾克馬爾對格羅寧根、精英隊對燕豪芬、芬洛對川迪及英超曼聯對史雲斯，低開即係機會大啦，最睇好芬洛對川迪，兩軍旺大，半場都係，過去三次對碰全部半場起碼有2粒，值得跟進。（周日晚8時30分開賽）

項目︰單雙

推介︰NAC單

玩單雙最好就係睇住往績，荷甲NAC主場對華域克賽事，入球單可說非常好路。不說不知，原來華域克是今季開單比率最高的荷甲球隊，達到61%，而NAC開單比率亦有48%，兩軍似乎對單「情有獨鍾」，加上這兩支球隊的對碰亦非常旺單，近八次交手竟全部開出單，值得再追。（周日晚8時30分開賽）

項目︰總入球

推介︰狼隊3球

雖然狼隊已篤定降班，但反而激發起球員的進攻意欲，主場面對愛華頓不會做縮頭烏龜，射手史提芬費查演出回勇，作客的「拖肥糖」季尾亦大踢進攻足球，特別係克羅地亞前鋒謝拉域近況勇銳，打了半季已有八球進帳，加上雙方於「狼穴」對壘經常入三粒，總入球「3」係唔錯選擇。（有線304台周日晚9時直播）

項目︰首名入球

推介︰柏比斯施斯

邊個係當紅「首球」球星？當然係紐卡素嘅柏比斯施斯。呢位塞內加爾射手加盟半季，聯賽已有13球進帳，其中有6球係打破僵局，成為「喜鵲」下半季振翅高飛主因。今晚迎戰擁有阿古路、泰維斯等名牌神箭嘅曼城，令柏比斯施斯嘅「首球」賠率更加好分，非常值博。（有線300及200台周日晚8時30分直播）

項目︰半全場

推介︰紐維爾舊生和客

阿甲降班大熱門奧林普明早將於主場迎戰積分榜排第二的紐維爾舊生，相信奧林普都難以阻擋後者贏波挑戰榜首位置。不過，奧林普今季聯賽主場出擊無論最終賽果如何，球隊半場皆能與對手打和，可見這支球隊上半場表現其實不算太差，只是賽事末段才會後勁不繼，預計今仗亦不會例外，半全場一於揀有4.8倍的「和客」。（周一凌晨4時開賽）

項目︰半場主客和

推介︰格雷特霍夫勝

德乙今夜進行煞科戰，其中格雷特霍夫將作客對羅斯托克。格雷特霍夫於積分榜暫領先法蘭克福一分，今晚只要贏波就肯定成為德乙冠軍，球隊自然全力爭勝。碰巧對手羅斯托克已篤定降班，球員失去爭勝意欲，相信不會阻人發達。格雷特霍夫今季贏波的場次，有多仗皆是上半場已領先對手，「半場主客和」客W有2.05倍，值得捧場。（周日晚7時30分開賽）