祖雲達斯「讓客」有計

猪拉多纳

06/05/2012
文： 郭球奇

連開波時間都管埋，仲邊夠祖記玩？意甲「一哥」祖雲達斯今晚作客卡利亞里，為咗表面上公平起見，賽前竟單方面要求更改開波時間，結果搞到對手陣腳大亂，撞正卡利亞里護級成功無戰意可言，朱楓覺得祖記今晚有權反彈，開出1.6倍「讓客」！（now632台周一凌晨2：45直播）

卡利亞里 Vs 祖雲達斯

卡利會長怒罵：不如揀埋球證


呢場比賽原本安排喺香港時間今晚9點上演，但祖記賽前突入信意足總要求推遲開波，希望同「米蘭打吡」同時間進行，以免畀AC睇住嚟踢。事後卡利亞里會長施連奴躁晒，話會方事前完全無獲足總同祖記徵詢意見，仲話突然改時間搞到佢哋多咗不必要嘅麻煩，覺得祖記好自大，叫佢哋不如揀埋邊個球證執法仲好。


其實，卡利亞里上場作客熱拿亞已經試過更改時間開波，結果搞到佢哋要臨時轉搭巴士去球場，最後亦輸波收場，今晚無端端又改時間，唔影響班球員嘅作戰心情就假，好在佢哋因對賽成績比第18位嘅萊切好，經已肯定提早成功護級，今仗都係志在參與，贏輸對佢哋嚟講根本冇所謂！

保方道歉反獲隊友安慰

唔同卡利亞里，祖記今場極需搶分爭標，睇佢哋賽前臨時改時間就知。祖記上場對萊切因門將保方一記低級犯錯失分，據講保方事後喺更衣室向隊友道歉，點知反獲安慰，睇嚟呢件事令祖記上下更加團結。再者，祖記近4次對賽錄得3勝1和，作客要贏卡利亞里兩粒相信只係時間問題。

卡利亞里對賽輸條街

12/01/15 客和祖雲達斯1：1

11/02/06 主負祖雲達斯1：3

10/09/27 客負祖雲達斯2：4

10/04/11 客負祖雲達斯0：1