錫菲聯鬧前鋒荒 撐史提芬納治

猪拉多纳

今晚英甲爆發升班附加賽4強首回合，史提芬納治會先喺主場對錫菲聯。史提芬納治喺季尾狀態好到得人驚，加上領隊加利史密夫對升班信心爆棚，今仗對住鬧前鋒荒嘅錫菲聯，絕對有力先下一城，平手盤捧得過！（開賽時間：周六凌晨2：45）

史提芬納治近年喺英國球壇極速上位，3年內由業餘聯賽升上英甲。今年繼續保持強勢，喺季尾最後6場成功衝刺獲4勝2和，結果憑得失球差壓倒諾士郡得第6，搭上附加賽尾班車。
向連續3季升班目標邁進

對於有望實現連續3季升班，領隊加利史密夫就歸功球員喺季尾連贏卡素爾同賓福特等競爭對手，仲話一班球員猶如戰士，已經上晒裝備對付錫菲聯，對爭升班極之有信心。事實上，史提芬納治喺今屆英總曾淘汰英冠一哥雷丁，喺16強更戰至重賽先不敵熱刺，潛力可以話深不見底。

對家錫菲聯今季長期排第2，點知季尾突然失準3場不勝，結果被死敵錫周三搶去「老二」，失去直升英冠資格，最大原因相信同今季喺英甲射入29球嘅射手卓雲伊雲斯，季尾因強姦罪成被捕有關，由於呢位前曼城前鋒目前仍喺上訴階段，今仗肯定缺陣，加上曾効力愛華頓嘅前鋒比亞堤，上仗作客埃克塞特突然發癲，雙腳飛剷對手被重罰停賽4場宣布提早收咧，搞到錫菲聯前線家陣只得番加斯威爾同基斯樸達兩名前鋒可以用，作客如狼似虎嘅史提芬納治實在唔似有運行。
英甲附加賽賽制：

聯賽第3名對第6名及第4名對第5名，採兩回合主客制，不設作客入球優惠，兩回合計打和將於次回合法定時間後加時30分鐘，再和則互射12碼決勝。