士砵亭大打「拉布戰」

猪拉多纳

葡超煞科日壓軸大戰，由士砵亭主場對布拉加。雖然積分榜頭幾位已成定局，但唔代表雙方會放軟手腳，預料今場兩隊都會保持積極及進取態度，入球數字唔會低，大盤開出機會高。

（有線155台周日凌晨4時15分直播）

士砵亭下星期就會出戰葡盃決賽，故此球員仍未可以放鬆心情，亦相信里斯本球隊會借助正式比賽去提升狀態，加上士砵亭近期喺主場戰績彪炳，當然會把握地利優勢搶攻。至於布拉加，因為前鋒洛迪高利馬仍然要爭神射手冠軍，賽前隊友已表明會全力支持佢爭取更多入球，況且布拉加對住「Big3」球隊特別好鬥志，肯定會向士砵亭作出反擊。兩隊今場都想攻，相信會利好大盤。
波圖大勝埋齋

另外，應屆葡超冠軍波圖將作客里奧艾維，「讓球客勝」捧得過。留意到波圖於季尾頻頻交出好表現，上周面對士砵亭亦淨勝兩球，證明球隊冇因提早奪冠而揸流攤。今場對手里奧艾維季尾近況麻麻，波圖應可輕勝。