拜仁Hea踢 撐多蒙特

猪拉多纳

德國盃決賽今晚喺柏林爆發，多蒙特對拜仁慕尼黑受讓平半值得再追。「蜜蜂兵團」達成德甲兩連霸後，專登等到聽日至舉行祝捷派對，擺明有信心拎埋德國盃再慶祝。相反，「凱撒大帝」碧根鮑華暗示拜仁會放棄德國盃，戰意成疑讓波自然要唔過。（翡翠台、高清翡翠台及廣東體育周日凌晨2：00直播）

講真，我真係估唔到多蒙特要兼顧歐聯，季初冇咩買人依然能夠再做德甲冠軍，教練高普有料固然係最大因素，射手羅拔利雲度夫斯基同新星馬里奧葛斯分別冒起都係大發現，而且多蒙特已經連續4次喺聯賽打爆拜仁，期間入7球、失1球，擺明攻守都食住對方，今場決賽冇理由唔捧。
押後祝捷派對預做雙冠王

仲有呀，多蒙特未確定冧莊攞德甲聯賽冠軍之前，其實就已決定聽日至舉行祝捷派對，原因好簡單，因為高層有信心喺德國盃砌低拜仁，希望球迷可以盡情享受雙冠王喜悅瘋狂慶祝，何況「蜜蜂兵團」對上1次輸波，已經係上年12月喺歐聯主場不敵法甲球隊馬賽，可以話打遍德國無敵手，受讓點都值得睇好。
碧根鮑華視德盃為雞肋

另一方面，拜仁有中堅雲拜頓繼續養傷，緊接歐聯決賽對車路士有3件停賽，根本承受唔到再有球員受傷，賽前碧根鮑華就話，只要拜仁攞到歐聯冠軍，德國盃完全可以「讓」畀多蒙特。據德國傳媒解讀，呢番說話係希望多蒙特贏波捧盃就算，千祈唔好整傷拜仁球員，疑似讓路格局，讓波點要得落？
近5屆德國盃決賽

年份 冠軍 比數 亞軍

2011 史浩克04 5：0 杜伊斯堡

2010 拜仁慕尼黑 4：0 雲達不來梅

2009 雲達不來梅 1：0 利華古遜

2008 拜仁慕尼黑 2：1（加時） 多蒙特

2007 紐倫堡 3：2（加時） 史特加

賽制：決賽以一場決勝負形式進行，若90分鐘內打成平手，加時30分鐘，若加時仍未分勝負，則互射12碼決勝
橫數千軍

多蒙特場均入3.5球

‧以往4次闖入決賽，有2次成功捧盃。

‧6連勝攻入21球，平均每場入3.5球。

拜仁旺開入球大

‧過去17次入決賽，合共有15次封王，捧盃率達88%。

‧近5場比賽包括德甲及歐聯，4度開入球大。