喜伯年貪盃益晒恩華尼斯

猪拉多纳

自從格拉斯哥流浪被罰扣10分之後，整個蘇超變得冇晒競爭，些路迪係咁意就提早5輪封王，本來全世界都以為佢哋會無驚無險，成為國內三冠王之際，卻因少咗流浪嘅鞭策，結果喺蘇格蘭兩大盃賽先後撻Q，認真係偷雞唔到蝕把米，假若流浪最終被罰埋降班嘅話，對些路迪甚至整個蘇超都冇好處。

由於流浪被禁出席來屆歐洲賽，篤定第3嘅馬瑟韋爾會取而代之，參戰來屆歐聯第3圈外圍賽，睇落好似係得益者，但事實上以佢哋嘅實力，踢歐戰都係送死居多。
恩華尼斯近兩戰冇失波

本周將上演蘇超最後一輪比賽，今晚就先上演尾6位球隊嘅廝殺，由於鄧弗姆林已於上一輪確定護級失敗，今晚3場蘇超都係例行公事，但講到最無心戀戰嘅，未必係來季甲組見嘅鄧弗姆林，而係上周先確定護級成功嘅喜伯年，事關佢哋下周末仲要出戰蘇格蘭足總盃決賽。

喜伯年領隊芬朗解釋由於之前要分心聯賽，搞到冇時間備戰足總盃，如今護級成功，當然要諗諗點樣錦上添花，有消息指有輕傷在身嘅中場索亞里斯、佐治卡路士、後衞麥柏基及古查比都會被收起，今晚作客近兩戰不失嘅恩華尼斯，正路要2倍主W。（開賽時間：周六晚10：00）

足球重心：恩華尼斯（主勝）

馬膽推介：4場3 兄弟齊心

上場雖然贏泥地1200米，但其實草地一樣耍家，最緊要係肯繼續出戰最擅長嘅短途，練馬師胡森今季僅贏得9場頭馬，仲未贏夠數畢業，相信必會鍊盡已7歲嘅「兄弟齊心」。