巴塞訪貝迪斯再開入球騷

猪拉多纳

巴塞隆拿雖無緣爭標，但今晚喺西甲煞科戰作客貝迪斯仍有一定戰意，始終美斯仲未攞硬神射手，何況呢場仲係教練哥迪奧拿嘅聯賽最後一戰添；貝迪斯就成功護級，不過近期都keep住有波入，冇包袱相信會繼續大踢進攻足球，有條件同巴塞合演一場「大」騷！（now632台及廣東體育周日凌晨4：00直播）

自從歐聯出局後，巴塞隆拿喺西甲隨即大反彈連贏3場，上周主場對愛斯賓奴雖然係例行公事，但照數對手4：0，美斯更食出大四喜。睇番射手榜，美斯暫以5球領先，但由於對手C朗聽晚將率領皇馬主場對馬略卡，有機「爆珠」，美斯想確保攞獎最好梗係入多幾粒啦！

事實上，美斯睇落亦唔似會留力，皆因今晚將係佢恩師哥迪奧拿最後一次帶領巴塞踢西甲，為好頭好尾，應會全力搶W送行，更何況西班牙盃決賽要隔成12日先上演，根本冇留力必要。由於後防主力佩奧爾因做膝部手術有排抖，賽前獲軍醫批准可以上陣嘅碧基，今季又因為掛住拍拖狀態急跌，今仗以攻代守係唯一出路。
貝迪斯為訪華造勢

今季重返西甲嘅貝迪斯，近期接連搶分成功提早上岸，之前對西維爾梅開二度嘅比納特，據講將獲貝迪斯大幅加薪續約，今晚肯定加多兩錢肉緊博再喊高個價。而且貝迪斯日前宣布嚟緊歷史性訪華，同英超富咸同中甲深圳紅鑽打兩場表演賽，希望開拓亞洲市場，斷估今晚唔會喺中國球迷面前踢悶蛋足球倒自己米啩？事實上，睇番往績，貝迪斯同巴塞隆拿近年交手玩慣鬥攻，就算中位數改做3.5球，都要照捧1.85倍大。
巴塞貝迪斯愛鬥大

日期 戰果

12/01/16 巴塞隆拿 4：2 貝迪斯

11/01/20 貝迪斯 3：1 巴塞隆拿

11/01/13 巴塞隆拿 5：0 貝迪斯

日期 戰果

09/02/14 貝迪斯 2：2 巴塞隆拿

08/09/24 巴塞隆拿 3：2 貝迪斯

08/03/29 貝迪斯 3：2 巴塞隆拿
橫數千軍

貝迪斯唔慣交白卷

‧連續4場開入球大，近16場聯賽得2場冇波入。

‧西甲主場7勝6和5負，不敗率72%。

巴塞美斯少開首球

‧上場入4粒嘅美斯，近9戰僅2次開出首名入球。

‧西甲作客11勝5和2負，勝率61%。