阿仙奴大殺3方

猪拉多纳

英超煞科除留意錦標誰屬，邊隊打入前四位、取得下屆歐聯入場券亦惹人關注！目前阿仙奴形勢最好，只要今晚作客擊敗西布朗便可穩奪季軍，直接進身下屆歐聯分組賽，但緊隨其後嘅熱刺、紐卡素亦肯定搏盡老命搶三分，激烈程度分分鐘勁過曼市雙雄爭標。

先講第三位阿仙奴，佢哋今晚作客西布朗，贏波就肯定奪季；雖然近四戰不勝，但「廠長」尹佩斯並冇跌Watt，近兩仗共入三粒，西布朗有主力布拉特缺陣，奧丹維治亦上陣成疑，加上球隊無欲無求，戰意肯定不及阿仙奴，捧客W！

（有線304及204台周日晚10時直播）
熱刺望大「富」大貴

第四位熱刺主場對富咸，上演倫敦打吡戰。熱刺下半季跌Watt，接連遇弱失分，雖然近幾場有回勇迹象，但面對風流波嘅富咸亦唔係話食硬，尤其對手踏入季尾放開懷抱比賽屢有佳作，包括主場逼和車路士、作客擊敗利物浦，近七場聯賽只曾輸畀愛華頓。熱刺主W熱至1.29倍唔值博，考慮到今場一旦有入波或出現鬥攻局面，寧捧入球大。

（有線302及202台周日晚10時直播）
紐卡素戰意壓拖肥

第五位紐卡素作客愛華頓，今場愛華頓讓波，好大原因係球隊季尾sharp醒，聯賽八戰不敗，贏埋今仗聯賽，排名就壓倒同市死敵利物浦。但以「拖肥糖」實力，要讓紐記始終有啲勉強，況且近兩仗對史篤城同狼隊都不勝，更難寄厚望。論戰意紐記必在對手之上，佢哋今場和都唔掂，戰意十足，加上陣中冇傷兵，夫添出戰受讓抵玩。（有線303及203台周日晚10時直播）