皇馬大舉侵「略」 求創100分壯舉

猪拉多纳

又係紀錄、又係C朗。皇馬今晚喺西甲煞科戰主場對馬略卡，贏波就可以完成史無前例100分壯舉，假如C朗入波，就會成為西甲史上首個單季射爆所有19隊對手大門嘅球員，皇馬1.36倍「讓主」可做過關變倍器。（now632台周一凌晨2:00直播）
C朗挑戰「19連爆」紀錄

雖然皇馬提早捧盃，但依然要滿足高層同球迷期望，拎多3分湊夠100分完美結束球季。何況，今季C朗已經射爆過西甲18隊大門，只得馬略卡未成為佢腳下犧牲品，相信C朗會盡情糟質馬略卡完成「19連爆」。

上星期皇馬以2:1砌低CF格蘭納達，作出10個正選位置輪換，只得C朗保留正選席位，證明莫連奴好明白佢對入波有超強渴求。再講，今場波賽後巴拿貝會放煙花盛大慶祝，對手馬略卡要搶分踢歐洲賽，形勢上好難死守，既然皇馬等緊開捧盃P，「讓主」值得熱捧。