史提芬納治鐵桶破錫陣

猪拉多纳

錫菲聯喺關鍵時刻遇上低潮，整定冇運行！英甲升班附加賽準決賽次回合，錫軍主場迎戰史提芬納治，自主力前鋒卓雲伊雲斯踎監後，錫軍就瘋狂跌Watt，首回合僅打和史軍○比○。大軍士氣低落，面對對手壓迫踢法冇甜頭，捧史提芬納治「讓球客勝」！（周二凌晨2時45分開賽）
錫菲聯射手坐監死晒火

錫菲聯本季一直順風順水，但季尾卓雲伊雲斯因強姦罪成被判入獄，令佢哋大失預算。卓雲伊雲斯本季共入廿九球，係球隊鐵打主力，錫軍食粥食飯都係睇佢；將軍一去錫軍果然頂唔住，聯賽最後三場攞得兩分，將直接升班席位拱手讓予同市宿敵錫周三，錫菲聯跌落第三，士氣已嚴重受損，加上老牌前鋒比亞堤停賽，另一射手加斯威爾亦有傷在身，而荷斯堅斯、文迪斯拿寧、基斯摩根同利仙尼都出唔到，就算主場出擊都讓唔起。

雖然只係「英甲六哥」，但史提芬納治實而不華，近三個月演出平穩，只係輸過一場作客賽事，絕對係豬頭骨。佢哋擅打壓迫戰術，面對冇牙老虎未驚過，受讓要捧！