柏雷素爾大無畏

猪拉多纳

亞冠盃H組爭持激烈，四隊都有機會出線，韓職勁旅全北汽車最後一輪主場鬥上季日職冠軍柏雷素爾，全北今場和波夠分晉級，但為免有閃失，必定唔會求一分，大軍火力近期全面回復，入得又失得，捧大最好！（now 671周二晚6時直播）

全北汽車頭兩場分組賽都輸一比五，正當個個以為呢隊韓職班霸會散晒，佢哋之後三場全部贏晒，射手李東國轟入四球，狀態大勇，將成球隊爭勝重要棋子。巴西裔中場伊連奴近期成為南韓球壇焦點人物，南韓主帥崔康熙有意徵召佢入國家隊，兩人曾於全北合作，但當地普遍球迷唔多接受呢位球員。伊連奴係當今亞洲頂級死球王，絕對唔易對付，柏雷素爾肯定有排煩。
柏軍森巴雙箭谷番起

柏雷素爾今季兼顧亞冠盃，搞到聯賽成績極曳，早前對廣島三箭大敗二比五，面對對手反擊束手無策，由於球隊今仗要贏波先可肯定晉級，焗住將防線推前搶攻，難保清白之身。柏軍上季能夠稱霸日職，全靠兩大巴西中場佐治韋拿同李安度杜明基斯，兩人近期逐步回復狀態，有本錢同全北鬥攻。兩隊上次碰頭，柏雷素爾於主場大勝五比一，今次相信又係另一場入球騷。

同日亞冠盃D組賽事沙特阿拉伯勁旅希拉爾主場對卡塔爾球隊艾加拉法，希拉爾又係和波即可晉級，但輸波隨時出局，艾加拉法則一定要贏波先有機會晉級，所以又係焗攻，兩隊首次交手打成三比三，今仗估計再次大手交易。
亞冠盃推介

全北汽車 大

歷基韋亞 勝

希拉爾 大