山度士踢到曉菲

猪拉多纳

明早南美自由盃八強首回合上演兩場阿根廷撼巴西兵團大激鬥，上屆冠軍山度士作客阿根廷沙士菲，山度士繼續由人氣高企嘅巴西新星尼馬孭飛，呢位前鋒踢波好似玩雜技一樣，夠晒娛樂性之餘，亦非常具侵略性，估計態沉嘅沙士菲勢難招架，山度士今場仲有得受讓，Mic少一於力撐「讓球客勝」。（有線61及201台周五早上9時直播）

巴西老牌勁旅山度士今屆自由盃表現充滿霸氣，尤其係上圈次回合大炒玻利瓦爾8比0，完全將對手玩弄於股掌之中。尼馬該仗入兩球之餘，仲不時以花式球技娛樂觀眾，非常招積，預料對手今仗會對佢嚴加看管。

不過山度士陣中好波之人又豈止尼馬，佢嘅隊友甘素、艾蘭奴及波捷斯都係獨當一面嘅猛將，如果沙士菲太專注對付尼馬，隨時顧此失彼，被山度士其他球員偷襲得手。事實上，沙士菲狀態麻麻，近七場主場更加未贏過，試問今次又點讓得起山度士呢？
小保加咬唔入富明尼斯

另一場，阿根廷小保加主場對巴西富明尼斯，現時阿甲聯賽爭標形勢激烈，次席小保加難以兼顧雙線爭標，佢哋上圈幾經辛苦先至晉級。兩隊曾於今屆分組賽交手，富明尼斯作客贏過小保加2比1，有助提升信心，富軍受讓當然要「讓球客勝」。

（有線61及201台周五早上6時45分直播）