經濟唔好假嘢當道

猪拉多纳

近年歐洲各地都傳出有球賽造假事件，除土耳其、德國、芬蘭之外，又點會少得意大利嗰分。自從○六年爆發電話門醜聞之後，有關當局向犯事球隊作出嚴懲，以為可收阻嚇作用。但事實上，阻嚇性相當之短暫及有限，六年來依然有意大利球隊涉及造假案。

球員肯收受利益作奸犯科，其實與歐洲經濟不佳有一定關係。當年歐洲好景，意大利間間球會都出得起錢請球員，職業球員根本唔使為生活而擔憂，只要肯努力，包保你夠響夠獎夠過世。當年意甲盛勢，更贏得小世界盃美譽，無奈好景不常，近十年八年歐洲經濟走下坡，球市自然會被整體經濟環境所拖累。老闆搵少咗，對球隊所投放嘅資源肯定減少，依家職業球員唔及以前咁風光，朝不保夕之下好容易走上歪路，尤其足球員生涯短暫，有邊個唔想搵快錢吖。
意甲人工跑輸通漲

有人反駁，經常見到某某球員有幾錢身家，某某球員有幾錢年薪。查實講來講去都係嗰廿個至卅個。大把球員窮到褲穿窿，日頭操波夜晚做兼職可謂大有人在。早前睇過一篇外國網站嘅經濟分析文章，分析師話現時意甲球員嘅薪酬，數字上的確比八十年代高，但如果計埋通漲的話，薪酬其實係倒退緊。

歐債危機揮之不去，而兩大足球強國西班牙及意大利亦為歐豬成員，唔排除兩國再會有大規模造假事件爆出。總之經濟搞唔好，做乜都唔靈啦！