歐國盃：槍迷睇Euro兵仔 只想施捷斯尼上位

猪拉多纳

作為一個阿仙奴超級Fans，今屆歐國盃其實都有唔少情意結，荷蘭嘅尹佩斯、捷克嘅路斯基、德國嘅梅迪薩卡同普多斯基、英格蘭嘅禾確特、法國嘅哥斯尼等等，不過如果你問我想邊個贏，工廠仔就自私啲講句：「快啲返屋企休息、備戰新球季好過啦！」
有傷在身 領隊仍撐No.1

唯一例外係波蘭，佢哋位門神施捷斯尼已經獲「廠迷」確認，會係未來10年首席門將，當然佢仍未到「世界級」地位（縱然工廠仔覺得佢有世界級嘅Potential），但有時就係一個大賽嘅表現，就足以令球員衝破關口，信心、地位大大提升。

之前睇過訪問，施捷斯尼嘅屋企就係對正波蘭主場館，佢一直夢想喺鄉親父老面前代表國家隊打歐國盃，但當時佢喺阿仙奴同國家隊都係屈居法比安斯基之後，之後佢嘅努力有目共睹，季尾仲一直帶傷死撐為阿仙奴把關。尋日睇到波蘭最新消息，領隊施梅達話雖然佢有傷，但照樣力撐施捷斯尼先係球隊No.1門神，工廠仔喺度祝佢喺今屆歐國盃一鳴驚人，為廠爭光！