俄羅斯烏拉圭歎細界

猪拉多纳

歐國盃開幕前，列強紛紛踢熱身賽備戰，今晚俄羅斯將於主場對烏拉圭。列入歐國盃A組嘅俄羅斯今仗旨在畀球員鬆筋骨同試陣，而且領隊艾禾卡特同球員唔想出現傷患問題，影響之後決賽周大計，踢起上嚟肯定錫身。烏拉圭亦有世界盃外圍賽後顧，雙方隨時Hea踢了事，阿King認為入球細穩陣。（now 632周六凌晨零時45分直播）

艾禾卡特今次召入艾沙維及柏夫里約真高等主力，陣容完整，但畢竟係熱身賽，唔好預期佢哋可以踢出高水準，最重要係唔好受傷，否則有主將因傷踢唔到歐國盃，真係喊都無謂，預料艾禾卡特唔會要求球員太搏，而且必然會大量換人試陣，難免影響球隊組織默契，削減入波機會。

烏拉圭將於下周末世界盃外圍賽對委內瑞拉，相信今場亦會留有一手，因此即使擁有蘇亞雷斯、卡雲尼及科蘭，亦不宜高估。烏拉圭近兩場熱身賽對意大利及羅馬尼亞，都表現唔出應有攻力，兩場都開細，可見佢哋唔多重視熱身賽。
比利時夠料贏黑山

另一場熱身賽比利時主場對黑山，兩軍都冇大賽跟身，論人腳比利時無疑遠勝一籌，曼城中堅高柏尼、阿仙奴後衞華美倫、愛華頓中場費蘭尼及里爾新星夏薩特都有份入選，可輕取黑山。

猪拉多纳