阿德主場蓄細獵鯨

猪拉多纳

亞冠盃十六強東亞區賽事展開，澳洲代表阿德萊德聯主場對日本名牌球隊名古屋鯨魚，阿軍08年憑穩健踢法取得亞冠盃亞軍，今季放棄聯賽專心踢亞洲賽，重現穩健作風，分組賽主場三戰不失，今戰硬撼鯨魚入波唔慌多，捧細！(now 671周二晚6時直播)

阿德萊德聯08年於維迪馬領軍下見關過關，成功殺入亞冠盃決賽，雖然最後不敵大阪飛腳屈居第二，但已創下偉大成就。事隔四年，阿德萊德聯現已改由高斯米拿領軍，眼見球隊國內戰績跌晒watt，高帥索性放棄澳職戰線，早將目標擺喺亞冠盃，球隊分組賽力壓賓約哥首名出線，成功踢走浦項制鐵及大阪飛腳，表現對辦，足見高帥決定正確。

阿德萊德聯今季於亞冠盃複製08年招數，靠穩健防守起家，防線於主場密不透風，分組賽主場三戰都能保持清白之身，穩陣到不得了！進攻方面，主帥高斯米拿仲未決定是否盡遣兩大射手沙治奧雲迪克及迪捷特攻堅，還是二選一打單箭頭，不過，無論點都好，阿德萊德聯板斧始終唔算多，冇本錢強攻對手，今次穩中求勝，主要靠死球爭取士哥。
鯨魚傷疲火力減

名古屋鯨魚球員平均質素必在對手之上，不過，大軍正面對嚴重傷兵問題，中場多位主將缺陣，包括重心球員丹尼臣哥度巴，令戰鬥力大打折扣。另外，澳洲中鋒約舒亞堅尼地受腰傷困擾，無法踢出最高水準，今仗面對阿德萊德聯防線冇乜優勢。剛踢罷聯賽匆匆飛越重洋，鯨魚將士疲於奔命，客場出戰唔敢冒進。兩軍戰戰兢兢，士哥有限，入球細啱心水！