歐國盃：俄羅斯 拋銀彈

猪拉多纳

當歐洲經濟深受債務危機摧殘嘅時候，身為金磚四國之一嘅俄羅斯財雄勢大，不但喺全球政治、軍事及經濟佔據重要角色，並逐漸將勢力伸向足球。俄羅斯喺阿布拉莫域等富豪支持下，已獲得2018年世界盃主辦權，現時目標直指今屆歐國盃冠軍，相信會繼續使出「銀彈政策」，以巨額獎金激勵球員爭標。

俄國足球力量可謂與日俱增，主因係有阿布呢類有心人士，不計成本投入足運，有傳06年佢資助俄羅斯足總，以稅後600萬鎊年薪聘請希丁克執教，結果上屆爆冷打入四強，證明「銀彈政策」奏效。而且阿布旗下車路士勇奪歐聯冠軍，令佢更加心雄，相信可助祖國稱霸歐洲，甚至全世界，預料阿布喺背後發功，出錢出力搵埋其他俄國富豪支持國家隊爭標，俄羅斯捧盃獎金好可能遠高於陷入經濟困難嘅傳統勁旅。

另外，俄羅斯球會愈來愈有錢，近年紛紛積極招攬球星，擁有伊度奧嘅安治，就係最佳例子。高質素球員湧入俄超，亦提升該國聯賽水準，俄羅斯「人財」俱備，的確有力突圍，冠軍有27倍抵玩。