英軍拍跳比利時獻細

猪拉多纳

未開波傷兵名單已水蛇春咁長，熱身賽仲會搏？咪玩啦！「哀兵」英格蘭出戰國際熱身賽，於溫布萊主場鬥比利時，賽前壞消息接二連三，林柏特、巴利退隊，韋碧克、格連莊臣、柏加又傷緊，如果再添傷兵，鶴臣真係撼頭埋牆，必定勒住班兵唔會去盡，捧細！（now 671及672周日凌晨零時15分直播）

鶴臣於一片噓聲中當上英軍領隊，呢名老帥腳頭似乎唔多好，一接手就麻煩多多，朗尼分組賽頭兩仗缺陣，本身已經夠頭痛，點知低處未算低，格連莊臣、林柏特均於操練中受傷，後者宣布退隊；艾舒利楊格、菲爾鍾斯於上仗熱身賽對挪威又拉傷，呢兩日只能做體能訓練；加上韋碧克、柏加仲未好番，「三獅兵團」中前場人手極度緊絀，決賽周開波前真係一個都不能再傷。
留番啖氣唔敢去盡

因為人腳捉襟見肘，為催谷狀態，有傳今仗柏加會紮住上，而早前為歐聯搏盡嘅幾名車路士球員如泰利等會踢一陣，連朗尼亦或落場湊夠11人。有傳英軍團隊操得班波太勁，球星們搏足全季後好多都頂唔順，所以搞到傷兵纍纍。鶴臣已搞出個大頭佛，今場熱身賽會盡派所有球員出場，並肯定落柯打就住踢。如此形勢，又點會多波入？
比利時唔係二打六

比利時陣中有好多英超球員，高柏尼、華美倫、費蘭尼、迪比利個個都有級數，再加上「金童」夏薩特，可謂粒粒皆星，但呢班波國際賽成績麻麻，近三戰都贏唔到。雖然比利時攻力唔曳，但作客毫無甜頭，預料今戰入波唔會多，捧細啱數。
補選 ENTER

佐敦軒達臣（利物浦）

菲臘積基爾卡（愛華頓）
退隊 EXIT

林柏特（車路士）

巴利（曼城）
英格蘭大賽前 最後熱身成績

10世界盃 30/05/10 中立場勝日本2:1

06世界盃 03/06/06 主場勝牙買加6:0

04歐國盃 05/06/04 主場勝冰島6:1

02世界盃 26/05/02 中立場和喀麥隆2:2

00歐國盃 03/06/00 作客勝馬爾他2:1