葡軍土國夾計做細界

猪拉多纳

國際熱身賽葡萄牙主場對土耳其，歐國盃大約一星期後就會舉行，葡萄牙當然會把握機會試陣。不過試還試，唔代表葡萄牙會搏到盡。第一梗係要保存體力應付大賽，而更重要係球員怕受傷影響出場機會。葡萄牙有大賽跟尾，球員心理上有顧慮。對手土耳其又冇份打歐國盃決賽周，踢熱身賽亦唔會太認真。兩隊都無爭勝意欲，今場可捧細盤。（有線61、201及155台周日凌晨2時45分直播）
葡萄牙熱身賽「好hea」

葡萄牙球星如雲，質素應該喺土耳其之上，不過球員有顧忌，今場會踢得比較平時錫身，五五波一定收腳費事受傷。特別係幾位孭飛球員如C朗及摩天奴，總唔希望喺大賽之前受傷。睇番葡萄牙近兩場熱身賽，先後對住波蘭及馬其頓都開出○比○，賽果已說明葡萄牙對於熱身賽唔太上心。

土耳其世界排名33位，某程度上反影出實力有限，再加上今場係熱身賽，更冇必要同對手打真軍。再講，土耳其近三次對葡萄牙都係開出細盤，相信今場總入球數字亦唔會有大突破。