阿根廷半場大劈瓜

猪拉多纳

歐國盃開波前，先帶大家去南美洲睇世界盃外圍賽，重頭戲阿根廷主場對厄瓜多爾。美斯自從做咗阿根廷隊長後，喺國際賽演出逐漸拍得住踢巴塞隆拿嘅水準，唔只入波咁簡單，並不斷為隊友創造破門機會，加上阿古路等拍檔狀態當起，半場可以炒「瓜」，一於直取中位數1.5球有2.25倍半場入球大。（有線61及201台周日早上6時30分直播）

美斯以往經常被批評喺國家隊表現遠遜於球會，但上年八月獲新帥沙貝拉委任為隊長後，知道自己責任重大，演出自然更加落力。同時正式奠定核心地位，隊友以佢馬首是瞻，情況就好似巴塞一樣，因此，美斯已將數胡魔法帶到國家隊，喺今屆四場外圍賽已有兩球進帳。

值得留意，美斯喺國家隊亦擔當策劃角色，不時為隊友助攻，阿根廷鋒線仲有阿古路、希古恩及拿玻里新星拿維斯等一級射手，把握力極強，有美斯拉開對方守將，入波就更加容易。由於阿根廷上次主場僅逼和玻利維亞，今場點都要做齣好戲向國民交代，上半場入兩球冇難度。
厄瓜多爾離高原變魚腩

至於厄瓜多爾有曼聯中場路爾斯華倫西亞孭飛，但獨力難支，而且佢哋離開高原主場就變成魚腩。難怪主W、半場主勝、讓球主勝、入球大全部熱爆燈，可博2.25倍半場大。

另一場烏拉圭主場對委內瑞拉，由於巴西係2014年世界盃主辦國，唔使踢外圍賽，烏拉圭趁機同阿根廷爭做外圍賽南美一哥，今次召入三大射手卡雲尼、蘇亞雷斯及科蘭，炒得起委內瑞拉，要「讓球主勝」。（周日凌晨2時開賽）