三神做寶藥黨冇誠信

猪拉多纳

近排喺日乙作客4戰不敗嘅大分三神，今日响味之素球場客戰東京綠茵，應該係時候斷纜輸波嘞，因為佢哋呢期煩緊還債，四圍搵人籌旗，邊有心機踢波吖！（開賽時間：周六下午4:00）

其實無論睇近績定係往績，東京綠茵都食唔住大分三神，足智彩開到綠茵個主W1.67倍咁熱，的確令人𢱑頭，事關綠茵歷來6次响主場對三神，只得2勝4負，而且佢哋近8場聯賽，當中3次主場全部不勝，對住近4場作客不敗嘅三神，憑乜去讓人呢？何況呢支東京球隊仲有中場杉本龍士左肩甩骹抖緊，前鋒南秀仁亦奉召踢日本U19國際賽添，個盤有啲鬼喎。
向擁躉籌旗1,100萬填數

但係大家睇埋另一單新聞，就知點解三神靠唔住嘞。佢哋前日宣布咗個「大分三神J1昇格支援金」計劃，向擁躉籌募資金爭取升上日職，目標係籌到1億日圓（約990萬港元）。原本有大志係好事，不過大家Check清楚來龍去脈，就會知佢哋似乎做緊寶藥黨呃緊人。

因為呢隊波喺2009年陷入經營危機，向聯賽會借咗6億日圓救命，依家還咗一半，但係除咗聯賽會條數，原來三神仲有條1.2億日圓（約1,100萬港元）嘅街數，要喺今年年中清還，佢哋今次推個咁嘅計劃，向大分縣球迷籌集1億，下一步仲準備向商界籌多2億，似係填氹多過大展拳腳，咁唔老實點信得過呀？班球員都驚老細走佬啦，都係博綠茵W正路啲。