西班牙「-2」指導國足

猪拉多纳

力圖衞冕歐國盃嘅西班牙，將會與中國進行最後一課「拍跳」。西班牙貴為歐國盃及世界盃雙料冠軍，實力當然高過中國一大截，相信可以喺主場輕鬆報捷。但贏波還贏波，唔代表今場會開出超大比數。始終西班牙冇需要去盡，以免影響決賽周部署。故今場唔會考慮「主其他」，簡單捧個「-2」「讓球主勝」。

（中央5台周一凌晨4時直播）

西班牙今年踢過三場熱身賽都輕勝對手，但三場都未能開出「其他」波膽，就算對委內瑞拉都只贏五比○。事實上西班牙班球員夾慣夾熟，根本唔需要學似其他球隊咁試陣又試腳，今場只係畀球員輕舒腳頭為主，入夠兩三粒就會收韁，冇必要贏到盡。
甘馬曹話明學嘢

中國由前西班牙領隊甘馬曹執教，當然清楚祖家嘅實力有幾強，故今仗只係給予中國球員一個學習嘅機會。甘馬曹喺記者會講到明，西班牙係世界冠軍，所以唔會太計較賽果，只希望球員藉熱身賽吸取經驗，繼而強化心理質素及技術水平。另外，中國隊飛咗成十二個鐘先抵達西班牙，部分球員仍未能適應當地氣溫及時差，對於發揮會有影響。