吳嘉晉停賽前3W過關

猪拉多纳

見習生吳嘉晉早輪因為不小心策騎被重罰停賽八日，昨天停賽前夕發威，憑「好辣椒」、「添歡笑」、「過關勇將」首度連中三元，為師傅葉楚航兩隻「好辣椒」及「過關勇將」勝出漂亮一仗。不過真係講都唔信，「好辣椒」雖然好耐冇贏，但係閘前飛數勁到不得了，幾下手腳就由6倍打到落2.7倍着啡格變埋大熱，結果順利得手，仲終止埋葉廐最近連續十三隻大熱門不勝嘅紀錄。
       
過關勇將以超慢步速一放到底。
好辣椒過關勇將啡格得手

航哥賽後坦言「好辣椒」都係跑番自己水準，不過季尾階段唔少對手都搏到七七八八，加上吳嘉晉又有七磅可減，至會贏得咁輕鬆。佢又話晉仔跑埋呢次就要停賽，會視乎隻馬嘅情況，嘗試安排「好辣椒」等埋贏馬拍檔至齊齊復出，希望可以繼續數胡。另外，航哥又提到晉仔呢輪騎馬有明顯進步，陣上安定馬匹嘅韁繩功夫愈來愈好，但係鬥拉士仲係唔夠硬淨，體能方面要再加訓練，寄望佢停賽期間可以多多努力。
       
好辣椒落到大熱門開跑，飛到馬到。

「過關勇將」以往四班跑過八次全敗，昨日着啡格被捧成5.1倍第三熱門掟甩對手，季尾輕磅果真威力無窮。