歐國盃：三獅兵愛煲魚生粥

猪拉多纳

唔少人鍾意刀仔鋸大樹，玩吓波膽貪佢本小利大，睇番今屆決賽周16路雄師，最受球迷歡迎嘅英格蘭，原來係最鍾意食「魚生粥」贏1:0嘅球隊，睇啱場合大家都可跟番多少。
鶴臣領軍唔慌進取

唔講太遠，就由三獅兵舊年9月7日小勝威爾斯1:0開始計，佢哋近7戰就取得5勝1和1負，所贏5場波竟然不約而同都係贏1:0。事實上，英格蘭依家換上經常帶弱旅嘅鶴臣掌帥，都唔使旨意佢會大打進攻足球。加上首席球星朗尼要坐兩場波監，中鋒安祖卡路爾腳風又麻麻，贏波都唔似炒到，1:0波膽抵博。

半場波膽則可以吼實波蘭1:0同0:1，喺佢哋近13場波入面，就有9次試過半場開呢兩瓣，單計領先1:0都有7次，比率極高。仲有呀，衞冕冠軍西班牙半場領先2:0亦係好路，近7場佢哋有3場係半場領先2蛋，始終佢哋實力超班踢法進取，半場鎖定勝局唔係難事。