巴拉圭高原踢「玻」得個「細」

猪拉多纳

今晚世盃南美洲區外圍賽，玻利維亞將主場對巴拉圭。玻利維亞近年人才凋零，家陣已成為南美洲魚腩，可惜巴拉圭唔爭氣，因嚴重傷兵問題只能半力應戰，隨時老鼠拉龜，入球細係朱楓首選！（開賽時間：周日凌晨4:00）

自90年代出產過「魔鬼」艾茲華利後，玻利維亞就一直喺南美洲區浮沉，日前主場不敵智利0:2後，喺世界盃南美洲區外圍賽以5戰得1和4負得1分排包尾，幾可肯定同2014年世界盃無緣。
玻利維亞外圍賽5戰未贏過

睇番玻利維亞今次人腳，巴甲甘美奧前鋒馬些路摩連奴已係大軍中最有名氣球員，不過呢位前韋根箭頭唔知因為受傷定狀態太沉，日前對智利連後備都冇，今晚上陣成疑。

巴拉圭目前喺世盃南美洲區外圍賽排尾3，想出線不容再失，偏偏射手奧斯卡卡度素同辛達告魯斯打柴，多蒙特箭頭巴里奧斯同祖記翼鋒艾斯迪加列比亞就因狀態太沉落選。由於陣容殘缺，巴拉圭領隊艾斯早喺上個月18號已拉大隊去玻利維亞適應高原氣候，安排22課操練睇吓用咩人好，不過艾斯到 依家都未決定正選陣容，咁無信心，今仗點咬得入玻利維亞呀？

賽制：

9支參賽球隊踢雙循環分組賽，小組頭4名直接進身2014年巴西世界盃決賽周，第5名則與中北美洲區第4名進行主客兩回合附加賽，決定出線席位。