飛馬之威爆冷後抖暑

猪拉多纳

李易達自從喺上個月6日靠「龍勝」同埋「乘奔御風」兩隻冷門馬起孖打破悶局後，佢嘅冷門馬繼續分外醒神。好似尋日嘅沙田賽事，達哥再次為馬迷帶嚟驚喜，由佢訓練嘅配售馬「飛馬之威」，喺第三場四班田草千四米爆出17倍冷Ｗ，馬房近四Ｗ都係逾10倍冷門，兼且全部都係由愛徒楊明綸操刀，季尾階段不妨吼實此對師徒嘅冷門馬，隨時帶來意外收穫。
       
飛馬之威又幫李易達省靚配售馬金漆招牌。

講到呢隻「飛馬之威」，雖然只係隻配售馬，但喺訓練配售馬最出色嘅練馬師李易達旗下就交到唔錯成績，連埋今鋪已贏咗兩場，絕對交代有餘。
       
李易達配售馬成績好。
千四最強仍有進步

不過，馬主之一馮咏聰就話達哥賽前同佢講「飛馬之威」位置機會居多，但最終順利贏馬，佢自己都有啲意外。佢仲話呢隻馬在港兩Ｗ都係跑千四米，似乎呢個路程特別耍家，同埋依家只係四歲，應該仲有進步，而佢仲講如無意外愛駒將提早抖暑，留番下季才再搏過。