羅比嫂識做唔黐身遙距撐老公

猪拉多纳

好就女人，唔好就累人。愛爾蘭領隊查帕東尼好明白呢個道理，所以禁止班手足喺比賽日同WAG見面。以羅比堅尼老婆Claudine為首嘅愛爾蘭太太團，尋日浩浩蕩蕩咁壓境，不過羅比嫂就好識做，講到明唔會騷擾老公，只會遙距打氣。

內衣名模Claudine早排喺都柏林悶到爆，搵完舊朋友聚舊又搵親戚吔飯，鬼咩！老公羅比堅尼晨早就隨愛爾蘭大軍展開操練，老婆冇人陪梗係悶啦！歐國盃殺到，Claudine尋日已經飛抵波蘭城市波茲南，到埗後仲即刻向愛爾蘭《每日星報》大呻掛住老公。
帶埋太太團入場

呢位27歲靚媽話：「歐國盃期間我都唔知會有幾多時間同老公見面，不過我好明白家陣係羅比堅尼足球生涯嘅大日子，我承諾唔會令佢分心，只會默默為佢打氣。」羅比嫂今晚就會率領杜夫同基雲嘅老婆Elaine、Jane齊齊入場，各位球迷落足眼力，睇波之餘，仲可以睇吓見唔見到幾位靚太啦。