波蘭下盤大報復

猪拉多纳

波蘭要於足球場上，同俄羅斯算清歷史恩怨！1940年，前蘇聯於「卡廷大屠殺」處決超過兩萬名波蘭人；兩年前波蘭時任總統萊赫‧卡欽斯基墮機身亡，波蘭人亦話係俄國所為。波蘭對俄國恨之入骨，歐國盃A組第二輪兩軍硬撼，波蘭全國近4千萬人口瞓身力撐下，主隊必打高兩皮波，受讓平半好路！（now 632及660周三凌晨2時45分直播）
「卡廷大屠殺」72周年

波蘭與俄羅斯仇深似海，兩國曾發生多次大型衝突，其中1919年就發生波蘇戰爭；去到40年蘇聯在卡廷森林屠殺接近22,000名波蘭軍民，當中包括戰俘、知識分子同平民；到2010年，波蘭總統萊赫‧卡欽斯基意外身亡，波蘭深信係俄國人背後搞鬼，因為卡欽斯基曾公開批評俄國。

波蘭人對俄國憎到出汁，今次歐國盃巧合編於同組，國內人都拍手叫好，希望主隊可以擊敗俄軍，為國民出番口氣。今次俄軍入住波蘭王宮附近酒店，據聞唔少本地球迷準備搞事，於雙方對撼前一晚於酒店外大吵大鬧，要搞到俄軍翌日冇精神比賽！
多蒙特孖寶煞食

體育唔應該同政治掛鈎，但有國人同仇敵愾，必定可以增強波蘭戰鬥力。波蘭中場哥錫基更表示，球隊上下都明白今仗有特殊意義：「不論對俄羅斯及德國，對球迷來說都好重要，我哋必須將身心全部投入球場。」

如以波論波，波蘭人腳、經驗當然不及俄軍，但呢班波勝在有活力，一班年輕人好團結，上仗鬥希臘一開波就係威係勢，如非換邊後突然少打一人，搞到班波陣腳大亂，九成可以全取三分。事實上多蒙特「攻擊孖寶」羅拔利雲度夫斯基，同隊長巴拉斯塞高斯基均狀態大勇，上仗失分必令波蘭爭勝意欲更強，加上全國人民齊心打氣，呢個力量唔可以睇小。軍情方面，門將施捷斯尼上仗領紅今場停賽，將由泰頓把守最後一關。
俄羅斯唔係咁超班

俄羅斯首仗大數捷克，表現的確唔錯，但好大程度上係捷克打唔出水準，俄軍絕非超班得咁犀利。呢班波好有經驗，依家手執三分形勢大好，面對主辦國如狼似虎，佢哋都唔敢冒進。最後一場對手希臘並唔惡搞，今仗就算攞一分都冇壞，作客讓平半風險高，必取下盤；而波蘭攻強守弱，俄軍把握力強，大盤亦可兼顧。