希捷交手專演悶戰

猪拉多纳

希捷兩軍交戰史，可以話悶到冇朋友，近年四次交手，僅得08年一次熱身賽由希臘入過一粒，另一個入球就係04年歐國盃四強，希臘喺加時以1比0淘汰捷克，打入決賽後成為當屆盟主。從往績所見，似乎捷克畀希臘食住。

其實捷克未分裂前叫捷克斯洛伐克，七、八十年代係東歐強隊，當時對希臘嘅戰績係5戰5勝，包括80年歐洲國家盃決賽周，以3比1擊敗希臘。
搏命王 沙賓基迪斯

經過首輪比賽之後，沙賓基迪斯已成為希臘陣中最搶鏡球員。當日希臘劣勢下，就係靠沙賓基迪斯取得扳平入球。及後沙賓基迪斯又為希臘博到十二碼，無奈隊友加拉高尼斯射失，白白錯失反超前機會。沙賓基迪斯狀態大勇，今場擔當正選好正路。
人氣八爪魚 施治

捷克首輪賽事慘失四球，但大家唔好因一場就睇低門將施治嘅能力，話晒施治都係五屆捷克足球先生，可謂捷克陣中最具名氣一員。現時捷克正處新舊交換期，戰鬥力同全盛期仍有一段距離，所以施治更加要發揮出最佳水平，以增強隊友信心。今年施治就成功協助車路士贏得歐聯冠軍，其豐富大賽經驗對整支捷克隊都有幫助。