「咪講」賽果畀我知！

猪拉多纳

話咁快歐國盃分組賽已經打到去第二輪，第一輪大部分賽事，我都係徘徊係網球同足球之間，就好似開幕戰，參與咗一陣pre-show之後，就過咗廠講法網，唔能夠同克勤、Ricky佢哋一齊睇直播。
俄羅斯國運旺要撐

今晚進入第二輪賽事，我終於可以坐低睇直播，我都幾支持波蘭，話晒都係主辦國。但今場佢哋對俄羅斯，我又覺得俄羅斯有機會贏，話晒上場佢哋贏四比一，仲要俄國美少女舒拉寶娃啱啱喺法網捧盃，俄羅斯好旺喎，所以今晚都係撐俄羅斯啦！

呢排我多咗句口頭禪：「咪講」，因為有時放break，或者完廠行出去，做足球嘅同事就好急不及待咁想同我分享場波及賽果，我一見到佢哋想開口講，我就先聲奪人話「咪講」，我返到屋企連新聞都唔會睇住，因為唔想知賽果，我要等睇「自選服務」原汁原味享受番成個比賽過程，如果知道比賽中發生咗咩事，我就會無心機睇番。其實原來唔止我，好多朋友都好似我咁！