英格蘭要爭氣呀！

猪拉多纳

返去為《Lifetival》開工，同事話我叻，事關我所支持嘅俄羅斯依家以不敗戰績喺Ａ組排首名，出線８強機會好大呀！唔通我係幸運女神，着過佢哋件波衫，俄軍就如有神助？唔太識波嘅我，即刻問同事，係咪最後個場輸波都出線，仲有英格蘭有冇機會呀？佢話俄羅斯要出線最安全都係羸波，就算和，都好可能要計得失球。至於英格蘭最後一場要硬撼主辦國烏克蘭，出線仍然有暗湧，我即刻有啲唔開心。
信晒「神獸」羊駝

之後，大家就鼓勵我，又話我知英國「神獸」羊駝尼古拉斯預測到今屆會係英軍捧盃，叫我要有信心，全力以赴就好啦！呢一刻我就有啲明白點解男士會鍾意睇足球，因為除咗球賽夠刺激之外，平時三五知己講波經都係一大樂趣嘛。

可能見我喺呢度講歐國盃嘅關係，大家當正我係球迷，仲叫埋我一齊估吓邊幾隊入到８強，純粹牙骹戰，睇吓邊個眼光最獨到。跟住大家同事都好認真，皺晒眉咁，又話睇走勢，又話上網check數據。我依家就有理無理，不理數據，全憑直覺，我嘅８強心水：俄羅斯、波蘭、德國、丹麥、西班牙、意大利、英格蘭、法國！唔知係唔係大家嘅共同心水呢？